政情：今日你上鏡：藝術發展要進步 巢錫雄：題材貼近大眾
儘管香港有意擺脫文化沙漠嘅稱號，但多年以來嘅藝術發展總係唔及得鄰近地區咁蓬勃，譬如過去十幾年來國內藝術家嘅作品屢屢成為拍賣會嘅焦點，相比之下香港藝術家嘅光芒就有所不及。早前喺一個活動上遇到香港當代藝術家協會副會長巢錫雄，佢話國內藝術家嘅專業水平的確好高，而國內嘅藝術成就，又同較低嘅物價及政府多加支持有關。
咁香港藝術家點急起直追？巢錫雄認為藝術其實係一種表達方式，只要題材貼近大眾嘅生活日常，自然會惹起共鳴繼而得到賞識。而佢嘅高足，本地藝術家李楚洳（Samantha）嘅作品，就反映香港當下嘅社會現象，從而得到某國際級拍賣行嘅青睞，仲會喺拍賣會連同其他大師嘅作品呈現喺國際收藏家嘅視野之中。