政情：八網難逃：大跳Stand Up 姚思榮「哥哥」上身？

首次對鏡頭又唱又跳

其實係香港旅遊發展局邀請咗包括一班業界人士幫手拍宣傳片，包括姚思榮、旅遊事務專員黃智祖、旅議會主席黃進達、旅發局總幹事劉鎮漢等，條片仲用咗「哥哥」嘅《Stand Up》嚟做背景音樂，就咁睇落姚思榮都跳得幾順利，唔通佢係有跳開舞嘅？

姚思榮話冇跳開舞，但勝在節奏感都唔錯，所以就算之前收到嘅兩條教學片都只係睇咗一條，但拍攝當日都總算跟得上。佢話自己對慣鏡頭都有啲幫助，但平時對住鏡頭都係好嚴肅咁講啲社會議題，又唱又跳又要有笑容都係第一次，而喺冇乜排練過嘅情況下，都只係用咗三十分鐘就完成咗佢嗰part，結果都算唔錯啦！

講到今年預算案撥咗逾二億元畀旅發局，姚思榮話希望旅發局善用呢筆錢，搞多啲好似今次條短片咁嘅宣傳，唔使好死板咁讀番啲資料同政策出嚟，相信成效會好好多。