政情：麥美娟首中頭獎 再抽過「贈」鄺美雲
每年三月唔少婦女團體都會搞活動慶祝吓三八婦女節，香港婦女動力協會日前就搞咗個籌款晚宴，協會會長兼立法會議員麥美娟（Alice）仲抽中頭獎，獲得總值八萬港元嘅雙人商務來回機票，中頭獎嘅Alice嚇到冇咩反應，司儀就出口術話要拎番出嚟再抽，最後邊個可以抽中呢？
中獎嚇呆 司儀笑言唔畀攞
Alice話自己畀錢買協會嘅獎券支持吓，點知突然話抽中咗佢有頭獎，嗰秒都唔識應對。而現場司儀就話唔畀Alice攞獎，要捐出嚟再抽過，下一位幸運兒就係港區全國人大代表兼珠海社團總會會長鄺美雲。
鄺美雲就話呢啲係彩頭嚟，所以點都要收嘅，不過就捐番錢畀協會，最後當晚協會籌咗三十幾萬港元。
Alice事後再諗番，先發現今次係咁大個女第一次抽中頭獎，所以唔識點去應對，笑稱下次要學鄺美雲咁回應。