政情：何俊賢炎夏搞巴西「睇肉團」

食物安全及環境衞生事務委員會最新一份文件顯示，委員會下次例會要調動議程，增加討論前往巴西進行海外職務訪問嘅建議。睇番文件，因為舊年三月有巴西出口商被揭發出售腐爛同含致癌物肉類，導致港府發出「禁肉令」，到咗十一月，飲食界議員同另一名議員陳恒鑌聯署畀委員會主席何俊賢（高佬賢），要求今年休會期間去巴西，深入了解吓當地出口肉類同禽肉嘅安全檢測工作喎。

料八月出發 了解當地食安工作

高佬賢就話，由舊年開始已經同巴西駐港總領事「打咗好耐乒乓波」，互相商討職務外訪嘅行程同安排，搞到依家終於傾掂數。佢又話因為起初對方安排嘅行程集中去睇農場，但覺得咁樣睇唔到食安相關工作，所以又要再傾過，而佢嘅要求係整個行程可以同議題相關，其他無再作建議。佢希望今次調動議程後，可盡快落實外訪內容，然後上內會審批。

由於香港未有直航到巴西，連同轉機等，需時二十多小時才可到達，據了解計算飛機航程後，今次外訪暫定於八月十二日至二十四日，前後約十三日。有份建議去外訪嘅陳恒鑌因為八月初會離開香港，未必能趕及回港一齊出發，要再作安排。佢就話無建議要去邊度，總之去到「有得睇肉就得喇」。

立法會近年唔少事務委員會都有搞外訪，而外訪團愈去愈遠，唔知幾時班議員可以環遊晒世界各國呢？之不過，喺舊年五月外訪以色列睇創新科技，曾爆出民主黨（白鴿黨）議員黄碧雲（一舊雲）帶埋老公隨團去，雖則佢老公係自費嘅，但佢兩人同自由黨嘅鍾國斌仲喺行程結束後留喺當地旅遊，結果惹起爭議，希望嚟緊八月嘅巴西外訪團，唔好再爆出呢啲風波喇！