中環出更：報告指冇財赤 會計界摑鬍鬚曾一巴
前財政司司長曾俊華（鬍鬚曾）喺任內曾領導「長遠財政計劃工作小組」，而工作小組的研究結果曾作出警告，指本港最快喺七年後出現結構性財赤。有會計界選委以過去二十年嘅政府收支數據作出分析，結果顯示喺二千個模擬情景中，每年調撥開支，有九成機會唔會引起結構性赤字。換言之，即係摑咗鬍鬚曾一巴。
指政府90%唔會有結構性赤字
會計界選委、公共專業聯盟政策召集人（金融與財政）韋志堅聯同多個退休銀行家，利用電腦做模擬分析，佢同立法會會計界議員梁繼昌尋日公布有關嘅報告結果。佢解釋，香港過去二十年嘅社會同經濟較大上大落，而過去嘅歷史亦可作借鏡。佢指政府過去將土地買賣收益等列為非經常性收入，而且亦低估呢類收入，例如將呢類開支調撥至經常收入，能增加社會福利、醫療同教育等改善民生支出。
韋志堅話根據研究結果顯示，若政府在未來十年中，每年將三百億至四百億元經常出現嘅非經常收入來支付經常性開支，有九成機會唔會引起結構性赤字。佢又批評過去政府只覺得自己係會計師，只懂「睇住盤數」，而非作為財務總監，佢認為財務總監一般係做風險管理，而且喺商界同銀行中好普遍，認為若果現屆政府能夠以呢種方式理財，先能夠反映政府嘅「理財新哲學」。
卓妮