中環出更：美容達人教揀香薰 醒腦提神
全球近年興起芳香治療，香港化粧品同業協會與國際芳療師協會，響應世界衞生組織建立「全球長者友善城市及社區網絡」嘅呼籲，合辦「芳療護老創紀錄」。身為美容達人嘅香港化粧品同業協會理事長陳郭詩慧（Melody）教路，香薰種類不分男女，只需要考慮功能，例如辦公室就揀檸檬等提神味道，喺屋企就揀薰衣草放鬆心情。
Melody話自己成日頭痛，所以會喺辦公室點燃薄荷味香薰，既可以提神，有時鼻塞仲可以通埋鼻添！同樣鍾情香薰嘅沙田區區議員龐愛蘭亦話會喺屋企用花嘅香味，辦公室就用水果味，話植物香氣係最舒適喎。
出身美容世家嘅Melody話喺十一歲時面部開始分泌油脂，於是問屋企人拎美容品做清潔，之後養成埋敷面膜嘅習慣，從此踏上美容之路。佢話美容習慣應該從小培養，所以佢依家開始會幫阿仔做眼部按摩。
相對於女士，男士對香薰似乎冇乜興趣，反而對香水就有啲心得。好似立法會批發及零售界議員邵家輝（Peter）就話，見過唔少大汗男士以為噴香水就可以遮蓋汗味，結果汗水加香味混合埋就變咗惡臭。佢話正確嘅做法應該係先噴止汗劑再噴香水，但係佢亦承認香港社會仍唔太接受男士噴香水，所以佢多數會噴喺車入面，咁就可以均勻啲嘞！
「芳療護老」按摩 破世界紀錄
講番個活動，大會原本計劃邀請三百五十名芳療師及美容師，但最後有二百九十六人出席，各人同時為一名長者以香薰按摩雙手，並喺見證人監督下，爭取打破「最多人數同時接受專業手部按摩」嘅健力士世界紀錄，現有紀錄為台灣嘅二百六十人。
卓妮