政情：考慮下年退休 梁福元想歸隱田園
十八鄉鄉事委員會主席梁福元投身鄉事服務都廿幾年，經常就原居民、鄉民有關嘅社會議題發聲，算係眾多鄉事委員會主席入面知名度較高嘅一人，但最近有傳梁福元喺今屆任期屆滿後，即下年就打算退休。梁福元就笑笑口證實，確實考慮退休，自己做咗咁多年，係時候讓位畀年輕人。至於邊個可以上位，佢就話「能者當之」，等一眾有志之士自己爭取喇！
成日做醜人 意興闌珊
梁福元仲話，依家新界嘅問題愈嚟愈多，有時佢反映一啲鄉民嘅苦況，會令到其他人「唔太高興」，搞到成日都要夾喺中間「做醜人」，有時都覺得有啲意興闌珊。
至於退休之後有咩搞？梁福元就話唔會全面退休，例如過往投放太少時間喺公司上，希望嚟緊可以「歸隱田園」，專心搞吓有機種植、有機食品咁話。