政情：G6食豬腳薑賀謝偉銓回歸
由立法會多名無黨派立法會議員組成嘅立法會六人組（G6）尋日搞新春午宴，菜單就有豬腳薑，莫非有人添丁？原來係因為立法會補選後，建築、測量、都市規劃及園境界立法會議員謝偉銓（Tony）重返議會兼重返G6，幾位G6成員都話，由G5變番G6好開心，所以特登食豬腳薑賀「添丁」。仲話雖然G6人少少，但都「五臟俱全」喎。
G6成員仲包括陳振英、陳健波、廖長江、馬逢國及姚思榮，佢哋之所以咁遲先搞新春聚會，係希望Tony喺補選勝出後，再齊齊整整聚會。
謝開始懷念議會外生活
Tony喺前年嘅立法會換屆選舉落敗，佢話好懷念議會生活，但係漸漸冇咁懷念時又開始有補選，依家重返議會，佢又開始有啲懷念議會外嘅生活喎。
咪以為Tony仲未準備好投入議會工作，查實佢已經加入發展、房屋、交通、環境、公務員及資助機構員工共六個立法會事務委員會。唔知下個立法年度佢會唔會爭取做番發展事務委員會主席呢？