政情：大灣區考察議員當旅行林健鋒勁無奈
由立法會經濟發展事務委員會等四個事務委員會組成的粵港澳大灣區考察團，將於下月二十日至二十二日前往大灣區五個城市訪問。立法會內務委員會尋日開會審批考察團建議，就喺準備通過時，有議員舉手問點解唔去參觀深圳交易所，又有議員話點解唔去廣州長隆野生動物園，仲爆出有議員因為冇得去視察高爾夫球場而退出，幾乎變成廣東旅行團，搞到團長商界林健鋒（Jeffrey）不知幾尷尬，仲臉黑黑離開會議室。
內委會會議去到尾聲時，就準備審批考察團，Jeffrey簡介完情況後，主席李慧琼就問有冇議員反對，點知金融服務界張華峰（肥老闆）舉手，問點解唔順便去埋深圳交易所參觀，話依家香港搞緊同股不同權問題，應該去睇吓，想知道係咪問過冇得去定係點。不過，李慧琼就話唔想喺度討論，但肥老闆就話「我同Jeffrey哥傾過兩次喇」，民主派議員隨即起哄贈興話「咁就唔啱喇！」
無安排參觀高球場 尹兆堅退出
Jeffrey就解釋，今次考察團只得三日，行程相當緊密，收到唔同意見，大部分人都覺得目前行程幾好。之後旅遊界姚思榮又舉手，問點解唔去廣州長隆野生動物園。此時民主派議員笑聲更大，紛向肥老闆舉起拇指，民建聯陳克勤更加話：「係咪真係去？係就我都報名喇！」隨後肥老闆又舉手想發言，Jeffrey悄悄講一句「唔好講咁多」，隨即離開會議室。
會議上，工程界盧偉國又提到有議員因為安排唔到去參觀高爾夫球場而退出，據講呢位議員就係民主黨尹兆堅，可能係同佢近期支持政府收回粉嶺高爾夫球場建屋有關，想去內地取經。
梁繼昌倡組團去中港交易所
Jeffrey會後坦言，已盡力滿足大家意見，「呢個位好難做（口架），下次畀其他人做團長」。財經事務委員會主席梁繼昌就出計仔，建議另外再搞考察團去參觀中港嘅交易所，可以滿足到肥老闆要求。其實咁多個委員會聯合搞一個考察團，都好難滿足晒所有人嘅要求，否則搞搞吓可能變成廣東旅行團，被外界質疑嘥公帑去玩就唔好啦！