中環出更：口哨吹國歌 曾蔭權被翻舊帳
全國人大常委會通過將《國歌法》納入《基本法》附件三，港府早前亦已啟動《國歌法》本地立法程序。多個團體尋日就《國歌法》立法召開記者會，有份出席嘅香港中文大學學生會前會長張秀賢（Tommy）就翻前特首曾蔭權爵士（曾爵士）舊帳，話曾爵士曾以吹口哨形式吹奏國歌，質疑曾爵士侮辱國家及違法。
范國威話噓國歌非靠立法平息
另外，立法會政制事務委員會尋日亦都討論《國歌法》立法事宜，多名議員就提及近年香港有球迷噓國歌。議員范國威（Gary）話，球迷噓國歌係緣於有內地教練種族歧視香港足球隊成員，政府應查根究柢、追本溯源去處理民憤，並非靠立法平息事件。
不過漁農界議員何俊賢反駁話，噓國歌係因為中國足協推出涉嫌種族歧視港隊嘅海報，事後中國足協已道歉，港方亦都接受，只係香港球迷一而再、再而三咁喺球賽上噓國歌，甚至後來仲出現港獨標語。佢仲舉例話，就算自己唔鍾意Gary而打佢一身，第一次都可以話火遮眼，但同類行為再發生就唔可以接受，認為無論任何國家或地區嘅國歌都應該被尊重咁話。
卓妮