中環出更：當年斷腳未有關愛座 麥美娟：有都唔敢坐
依家港鐵同巴士都設有關愛座，原意係想提醒啲人讓座畀有需要嘅人士，但係關愛座近年就被網民形容係「批鬥座」，只要唔係長者，一坐落去就好容易畀人擺上網批鬥。立法會議員麥美娟（Alice）早前出席港鐵一個活動時，講起十年前整斷腳，如果當時有關愛座就好嘞，不過諗真啲，如果當時真係坐咗，都好驚會被人鬧喎！
港鐵大約喺九年前設關愛座，Alice當年斷腳時仍未有。佢話當時腳上有螺絲鐵片，行路都覺得好辛苦，若有關愛座一定好想坐。不過被人見到佢唔係幾十歲人，一定會怪責佢點解爭位坐，唔會明白佢腳痛囉！
基哥唔畀外孫帶氣球搭港鐵
佢認為科技發達，影相只係一秒，好難了解成件事，所以希望大家唔好太輕易相信網上流傳嘅相，就算被人影咗相擺上網，亦唔使太介懷，網上世界係「認真就輸了」。運輸及房屋局副局長蘇偉文都認為，關愛座原意係好嘅，只係實行時有啲人有誤解，若果多啲溝通包容就會好啲。
港鐵車務營運主管李聖基（基哥）同公司事務總監蘇家碧都喺度，基哥有個三歲幾嘅外孫，非常黐佢，笑言自己最聽外孫話，但若果佢想帶氣球搭港鐵，就一定唔畀，事關近年大熱嘅飄浮LED發光氣球可能有易燃氣體，好危險。提起近年好多市民都鬧港鐵事故多，蘇家碧就話港鐵載客量大，一旦有事故，受影響嘅市民自然好多，始終機器嘅嘢，難免有事故，但港鐵已經盡快修復o架喇。
卓妮