政情：陳帆亂噏三權分立 葉劉指正司法獨立

其實陳帆過往都講過令人震驚嘅言論，試過講起樓價飛升，年輕人買唔到樓，又少少想有自己嘅空間，「讓個軀體同個靈魂出去游走一下」，就去買車。喺一地兩檢嘅法案委員會上，佢又試過代律政司司長鄭若驊搶答基本法嘅問題，聲稱「或者唔識法律都可以講吓普通人嘅睇法」。

討論一地兩檢方案 搞錯憲制觀點

喺尋日召開嘅法案委員會會議上，議員尹兆堅問到一地兩檢若受到法律挑戰時，有冇後備方案時，陳帆就提到香港係三權分立，即時被保安局前局長、現時身兼行政會議成員及立法會議員嘅法案委員會主席葉劉淑儀即時指正，喺憲制觀點上唔係三權分立，係司法獨立。

除咗陳帆語出驚人外，立法會議員梁繼昌都提出令人訝異嘅問題，佢問到高鐵西九龍口岸嘅內地口岸司法管轄區嘅立體空間為何，與香港司法口岸管轄區又有冇重疊，站內若有人想跳樓，可能涉及穿越不同司法管轄區。

陳帆就寸梁繼昌問題有深度，指一般普通人喺地面上行走，因而冇計算立體空間，局方會試圖計算數字，任何人進入西九龍站，只要企喺地上，喺任何一個時空都只歸屬一個司法管轄區，兩個司法管轄區喺平面同立體上都冇重疊，對於有人跳樓嘅問題，佢強調係以同一個時空去判斷，若要分析，或涉及數學理論才能處理。

另外，葉劉尋日將議員嘅第二輪發言減少一分鐘時間，遭議員陳淑莊同朱凱廸質疑，葉劉話無意好似主持人事編制小組委員會咁，每輪發言時間都愈減愈多，即使係主持人事編制小組委員會時亦好寬鬆，反而政府就話有三十個項目等緊排隊上，對佢嘅主持方法好不滿，自己會處理政府對佢嘅投訴。朱凱廸就話「我哋幫你投訴番佢」，但就「食檸檬」，葉劉話「呢啲等我嚟處理」。