中環出更：營商新模式郭正光推零售快閃車
喺香港做零售生意，最頭痛係舖位問題。雖則網上購物係零售業大趨勢，但畀顧客體驗產品特色嘅地方仍不可或缺。香港O2O電子商務總會（總會）資訊科技及應用科技部總監郭正光（Francis）就想出「零售快閃車」，只要配合手機支付就可繞過實體店來交易買賣。
所謂零售快閃車，其實係流動嘅無人銷售店，概念同過往香港嘅流動小販類似，顧客可隨意觸摸快閃車上陳列嘅貨品之餘，又可透過鏡頭同設計師直接溝通。Francis話明白快閃車可能會觸動既得利益者嘅神經，傳統倚靠店舖營商嘅生意人未必樂見，從而招致反對聲音亦講唔定，但面對可能出現嘅阻力，年輕人仍要大膽去試，否則香港就會愈嚟愈冇創意。至於會唔會要求政府劃出供快閃車營運嘅地點呢？佢話以自由經濟嘅角度而言，政府愈少插手就愈好。
孫榮聰準備迎接工業新時代
講起香港推行O2O呢種營商新手法，身為總會副會長嘅孫榮聰話不容忽視，因為線上線下嘅互動營商手法將會促使產品邁向個人化發展，一改過去工廠大量生產嘅模式，所以佢都要與時並進，以迎接「工業4.0」嘅新時代。而總會創會會長陳嘉賢就為推廣線上線下嘅營商發展舉行一場慈善音樂會，籌得款項用於支持培育本地特殊藝術嘅慈善機構「顯能創作」。
「顯能創作」創辦人趙麗娟話，某啲具有藝術天分嘅殘障人士如自閉症患者，佢哋觀察世界嘅角度同一般人有別，無論用色同功法都予人耳目一新之感，其畫作應用喺產品包裝頗受商界好評，而O2O正可為殘疾藝術家開拓好似數碼畫廊嘅展示空間。
卓妮