要聞港聞
中環出更:王淑慈想追B難夾生肖好頭痕
王淑慈(左)主辦青委聯誼活動,詹耀良(中)及太太詹陳桂蓮(右)都去支持。(余素月攝)
風水術數嘅嘢,普羅大眾愈知得多就愈迷惘。香港浙江省同鄉會聯合會(浙聯)青委主席王淑慈(Sukey)最近就好頭痕,事關佢原本想發力追個BB,但最近先知有生肖相沖嘅講法,狗同豬分別同佢及老公相沖,要等到後年生鼠BB先至啱晒兩人。Sukey笑稱唔想等,因為囡囡依家十四個月大,想快啲生個細佬妹同囡囡作伴。
浙聯青委早前舉行一場新春晚宴講座,搵精通術數及畫畫嘅香港風水畫藝會會長袁志明解說流年,並從風水角度賞析畫作。Sukey為咗籌備呢個活動,聽咗唔少同風水流年相關嘅知識,難怪佢覺得十五十六喇!
詹嘉莉過年習慣去拜山
形象顧問關馬麗怡(左)介紹麥超傑(右)同袁志明(中)相識,促成舉辦今次講座美事。
詹嘉莉(左)同Helen(中)及柯琼浩(右)老友鬼鬼。
當晚出席講座嘅仲有青委前主席麥超傑、常務副主席詹嘉莉(Kelly)及副主席柯琼浩等人,浙聯會長詹耀良夫婦、秘書長顧東華及太太Helen都喺度。新正頭,最緊要講好意頭,不過Kelly就話過年期間屋企人習慣去拜山,今年都唔例外。
點解新年流流去拜山?家族有「手套大王」稱號嘅Kelly笑笑口解畫話,佢哋一到冬天就得閒啲,所以會去拜山,唔使喺清明節或重陽節同人哋逼。Kelly嘅叔父詹耀良都有去,佢笑稱百無禁忌,相信先人會保佑孝子賢孫嘅。
詹耀良仲提起今年將慶祝浙聯成立廿周年,重頭活動除咗大型晚宴之外,仲會趁暑假舉行千人高鐵團,帶一千名香港青少年去深圳坐高鐵北上浙江,希望增進港青對內地嘅了解。
卓妮
第一手消息請下載on.cc東網iPhone/iPad/Android/Windows Phone Apps