政情：兩個司長避火頭 茶煲掟畀羅致光

張陳力銷預算案 不談「補鑊」

波叔同張建宗喺網誌繼續推銷預算案嘅措施，波叔力銷預算案點為年輕人提供就業同發展機會，政府將會點樣支援創科同電子競技等嘅發展，而張建宗就講吓預算案會點促進少數族裔向上流動。兩人隻字唔提補鑊基金同全民派錢。

反而羅致光喺網誌主動提到，對有評論者話唔應該用關愛基金為預算案補漏拾遺嘅講法有啲意外。佢話關愛基金成立第一日嘅功能就係補漏拾遺，先導先試。之前幾份預算案嘅紓困措施曾漏咗新來港人士，亦曾被批評忽略「N無人士」，政府都係透過關愛基金補漏，包括曾經向年滿十八歲、低收入嘅新來港居民派發六千蚊，同埋為「N無人士」發放一次過生活津貼。

羅續解畫 稱關愛基金不止扶貧

由於過去兩份預算案縮減紓困措施，所以關愛基金冇再推行相關項目，佢仲話可能係停咗兩年，部分立法會議員都唔記得咗，關愛基金連續五年，都扮演住呢個角色。對於有意見認為關愛基金係扶貧基金，佢就話關愛基金唔單止係扶貧基金，而「有經濟需要」人士，亦唔一定係指「窮人」或者收入低於官方貧窮線嘅人士，例如接受資助特定癌症藥物嘅受助人，可以係中產甚至係高收入人士。

其實，無論羅致光點解畫，市民都唔會受落，事關唔全民派錢，確實令部分市民係冇受惠，一蚊都落唔到袋，唔嬲爆先奇。最離譜嘅係張建宗同波叔，明知民怨沸騰，竟然轉移視線，甚至將個茶煲掟咗畀羅致光。之不過，依家泛民同建制都要求政府派錢，波叔同張建宗都咪使旨意可以甩身。