中環出更：新田購物城拍烏蠅 象哥搵內地團「做旺佢」
由立法會進出口界議員黃定光（象哥）牽頭搞嘅新田購物城，經過多年籌備終於喺過年前開幕，點知拍晒烏蠅。象哥早前出席一個活動時透露，正密鑼緊鼓度橋做旺個場，例如搵香港旅行社東主協會會長葉慶寧傾，點樣安排入境旅行團喺購物城轉車，希望谷吓人氣。
香港廈門聯誼總會早前舉行春茗，總會理事長林龍安亦係香港中華出入口商會（中出）榮譽會長，所以身兼中出榮譽會長嘅象哥同太太林淑儀、會長張學修及秘書長陳勁等人都出席撐場。卓妮問陳勁有冇去購物城幫襯？佢就笑笑口話中出年年都會舉辦春遊活動，往年會去行吓山，今次就特登安排去購物城，希望大家熟悉啲，幫手做旺佢咁話。
黃友嘉新春去大灣區「行大運」
當晚出席嘅政商界人士好多，包括陳勁個仔、中出會董陳少山、強積金管理局主席黃友嘉、考試及評核局主席陳仲尼等人。新年期間內地春運人次突破三十億人次，好多人都避免返內地同人逼，但黃友嘉就未驚過，佢喺新春期間嚟一趟大灣區自駕遊，去咗珠海、中山、肇慶、東莞及深圳等城市，好似行大運咁。佢笑笑口話春運期間啲人走晒，高速公路上一架車都冇喎。
林龍安太太、中出副會長郭英蘭同三個仔女都有到場，佢哋過年返廈門陪媽媽，大年初五先至回港。林龍安希望嚟緊多啲加強同內地嘅溝通交流，為港人爭取更多創業機會同優惠政策，亦會組織喺香港嘅鄉親返內地，令港人增進對內地嘅認識同感情。
卓妮