夫婦召的士上錯車 無折打 發爛渣
【本報訊】「折頭的士」彷彿已經成為不成文規定，深受不少乘客歡迎。但上周五（9日）有一對中年夫婦，疑因叫車後上錯正價的士而與司機發生糾紛，到達目的地鑽石山後更需報警處理。司機指因乘客「上錯車」，拒絕打八五折，乘客卻辯稱明明電召折頭的，是涉事司機無良，「認人哋架車」搶生意。
糾紛影片事後由涉事的士司機上載到Facebook群組。「問你係咪將軍澳，call咗（車），你話係！」一對中年男女在鑽石山鳳德道荷里活廣場門口與的士司機鬧交，他們不滿上車時，司機未有指出並非折頭的，直至開車後，才知上錯車。
的哥拒就範 雙方鬧到報警
男女一路斥責對方：「無良司機，搶人生意！」司機隨即反擊指：「自己坐錯車，再(抓)我畀折頭。」更透露原來是因拒絕打折堅持收正價，因此惹起糾紛。司機留言指，當時片中女子曾問有否折頭，自己已「好聲好氣拒絕」，之後便被粗口謾罵。雙方各執一詞，最終要報警處理。
有網民指的士收正價天經地義，亦最能保障雙方權益，避免爭拗，更何況乘客上錯車也有責任：「一口價，睇錶畀錢，唔會收多你，更加唔會收少你。」有人慨嘆雙方為了數十元，「難睇到咁」，並指「冇錢就唔好搭的士啦！」但有人認為是的士冒認折頭的搶客在先，難怪乘客深深不忿。