政情：「死去活來」豐富人生 蔡若蓮倡睇傳記
教育局前局長吳克儉曾自爆月讀三十本書刊，唔知現任教育局副局長蔡若蓮又追唔追得上佢呢？蔡若蓮尋日出席同閱讀有關嘅活動時話，冇統計每個月嘅閱讀數量，但就經常去圖書館，佢仲推介小朋友多啲睇傳記，話可以睇到死去活來，人生變得更豐富喎！
30歲前大力投資閱讀上
曾任語文科老師嘅蔡若蓮認為，閱讀係便宜嘅活動，因為只需要花少少時間去閱讀，就可以吸收到作家畢生心血嘅精華，其中閱讀名人傳記就可以了解佢哋生平，亦感受到佢哋嘅喜怒哀樂，呢個過程就等同經歷佢哋嘅一生，所以多閱讀能夠多次死去活來，連人生都會變得豐富，睇嚟佢真係非常投入閱讀嘅世界。
咁到底蔡若蓮有幾鍾意睇書呢？佢就話三十歲前，將大部分嘅錢都投資到閱讀上，而佢更大讚閱讀係人生導師，加上小朋友係社會嘅將來，所以會大力投資喺閱讀上。