中環出更：陳沛然指廣東話唔好 礙少數族裔行醫
政府喺新一份財政預算案預留五億元加強支援本港約二十五萬少數族裔人士，不過醫學界立法會議員陳沛然（Pierre）就話，喺香港就讀醫科嘅少數族裔人士為數唔少，當年佢讀醫時，同屆百多個同學中就有約一成係少數族裔學生，但往往因為廣東話唔好，最後做唔成醫生。
認為政府要諗計幫手
Pierre話，由於醫科係以英文為主，所以對少數族裔學生讀書並不構成問題，但佢哋畢業後就大部分都只能從事化驗或麻醉科等非前線接觸病人嘅工作，原因就係少數族裔人士唔精通廣東話︰「如果聽唔明病人邊度痛，或者病人唔知你點開藥，係唔容許發生」。Pierre就覺得，雖然政府話要加強支援少數族裔，但語言能力係天生嘅，佢又以自己為例，話佢都學過法文，但「唔識就係唔識」，冇得勉強，認為政府要再諗吓計幫手先得。
言語不通會造成溝通障礙，但一向鍾意踢波嘅Pierre就覺得，球場上係不存在語言隔閡嘅，只要一個眼神或者揮手，甚至只需叫對方姓名，隊友就識得走位同傳波，笑言足球運動本身就係一套語言喎。
卓妮