中環出更：簡陳擷霞備麥芽糖 骾喉救急
早前有兩歲BB女食提子唔小心骾喉搶救不治，令人好心噏。做過護士嘅博愛醫院副主席簡陳擷霞認為，社會應多啲推廣家庭急救常識。佢就話習慣喺屋企放一樽麥芽糖「看門口」，因為以前佢媽媽試過骾魚骨，有醫生就教佢吞麥芽糖救急。不過簡太強調，食麥芽糖都要好小心，因為太大啖一樣會骾親o架。
早前仁愛堂、博愛醫院及圓玄學院合辦嘉許義工春茗活動，筵開一百四十幾圍，三個善團董事局成員都出席撐場。身兼香港聖約翰救護隊九龍分區長官俱樂部主席嘅簡太話，自己都試過食牛扒骾親，塊肉唔上唔落，好彩後來自己都搞得掂。
王陳鴛鴦教小朋友食嘢坐定
博愛總理王陳鴛鴦同韓嘉軒都覺得湊小朋友要好小心。有四個仔女嘅王陳鴛鴦話，佢都好理解家長有時睇唔到咁多嘢，惟有盡量教小朋友食嘢時要坐定定，唔好周圍走。仁愛堂副主席陳鑑光就話，自細父母教落食嘢時唔好講嘢，唔單止食提子有危險，其實朱古力或果仁都一樣好危險，最好咬開嚟食咁話。
講番個活動，圓玄學院主席陳國超話，三個善團每年新春期間都會合辦長者春茗及義工嘉許午宴，今次共有一千六百幾位長者出席，當中仲有幾位百歲人瑞添。佢話想藉此鼓勵同推動優質義工服務。三個善團去年共有超過一萬名義工，服務時數超過廿五萬小時，真係難能可貴。義務工作發展局主席沈之弘就話，希望爭取二○二○年喺香港舉辦世界傑出義工大會，進一步推動義工服務喎。
卓妮