政情:吳永嘉獲委任理大校董

政府尋日刊登憲報,公布委任立法會工業界(第二)議員吳永嘉為理工大學新任校董會成員,任期將由下月一日起生效,為期三年。對於首次獲委任為校董會成員,吳永嘉話希望令高等教育更上一層樓。

曾任教育相關工作

吳永嘉話,自己喺出任議員前,曾任免費幼稚園教育委員會其中一個工作小組成員,對教育有一定嘅認識,亦同理大校長唐偉章相識。他話自己所代表嘅中華廠商聯合會(廠商會)旗下有兩間中學,而且廠商會亦好支持和認同理大嘅教育理念。

作為理大校友嘅前立法會工業界(第二)議員林大輝亦曾出任理大校董會成員,前年更獲委任為理大校董會副主席。其實廠商會同理大關係好密切,近年更加成為理大嘅大「水喉」,一四年廠商會曾豪捐三千萬元畀理大,現時校園內有一座以廠商會命名嘅大樓,就係當年理大嘅「回禮」喇!

第一手消息請下載on.cc東網iPhone/iPad/Android/Windows Phone Apps