政情：今日你上鏡：利敏貞「鳳袍」太震撼 網友叫何國鉦打救

商務及經濟發展局常任秘書長（通訊及創意產業）利敏貞喺農曆新年後首個工作天，以一身「鳳袍」示人震撼網民，雖然獲其上司、商經局局長邱騰華力撐有Fashion Sense（時裝觸覺），但利敏貞就一直深潛，連香港電台新春團拜、立法會春茗都缺席。不過，時裝設計師何國鉦日前就喺禮賓府捕捉到呢位網絡紅人，當日利敏貞打扮比「鳳袍」低調得多，但就同樣以花花圖案為主，睇嚟佢對花都情有獨鍾。何國鉦將合照上載到社交網站，有網友就留言叫佢打救利敏貞，更有人問佢有冇獻上時裝貼士，睇嚟大家都好關心利敏貞喎！