政情：質詢提足20條 葛珮帆膺立會「Q后」
監察政府、解決民生議題係立法會議員主要職責之一，議員可以喺立法會大會上透過口頭或書面質詢，要求官員回應及提交相關資料，以了解政府工作進度及最新情況。而二○一七至一八年立法年度已經過咗一半，議員理應已經提出唔少質詢跟進問題，點知竟然有四位議員過去五個月完全無提出過質詢，唔知算唔算失職呢？至於提出最多質詢嘅係議員葛珮帆，共提出二十條質詢，成為立法會「Ｑ后」！
根據立法會網頁嘅資料顯示，截至今年三月一日，一共處理過三百二十四條質詢，當中有廿二位議員係未曾提過口頭質詢。不過，大會每次只容許六條口頭質詢，有時更因為會議辯論撥款法案或施政報告而不設口頭質詢，而今個立法年度只處理過七十八條口頭質詢，所以多人未提過並唔出奇，起碼仲可以靠書面質詢去跟進關心嘅議題。
四議員零口頭書面質詢
至於書面質詢嘅數目較多，截至今年三月一日，共處理過近二百五十條，之但係竟然有四名無提過口頭質詢嘅議員，連書面質詢都冇提過，佢哋分別係地產及建造界石禮謙、紡織及製衣界鍾國斌、新界西議員何君堯及新界東議員容海恩，唔知佢哋係對政府嘅施政十萬個放心，定係發現唔到社會、所屬選區或業界內有任何問題呢？
除咗有四名議員零質詢，都有三名議員喺過去幾個月只提出一條書面質詢，分別係航運交通界易志明、九龍東議員黃國健及新界西議員朱凱廸；其次有八位議員就提出過兩條質詢。
葛質詢涉及範圍極廣泛
另一邊廂，勤力嘅議員就密密提質詢，好似提得最多質詢嘅議員葛珮帆，一共提出廿條質詢，當中有五條為口頭質詢，而佢所問及嘅範疇既有婦女、動物同罕見疾病患者權益問題，亦有無牌旅館、泊車位、鐵路服務等民生議題，範圍廣泛。緊隨其後嘅分別係提咗十七條同十六條嘅資訊科技界莫乃光及會計界梁繼昌，而九龍東議員謝偉俊及新界東議員陳克勤都分別問咗十五條及十三條質詢。
其實議員關心嘅議題多寡並唔係最重要，反而係有冇盡議員責任，不過公道啲講，四位冇提過質詢嘅議員可能透過其他途徑為市民解決難題都未定。