中環出更：吳得掂公幹飛行里數兌到盡

教育局前局長吳克儉（吳得掂）因為在任時頻頻外訪被揶揄為「旅遊局長」，卸任退休後更加係攞正牌去玩，食得招積，遊得出色。有人就質疑，吳得掂有冇將在任局長時周圍飛賺取嘅飛行里數據為己有，留番退休後私用。不過教育局就話，吳得掂卸任前已幾乎將飛行里數用到盡，只係剩餘約一萬飛行里數喎。

政府高官不時乘搭飛機四出外訪，儲儲埋埋唔少飛行里數，在任時周遊列國嘅吳得掂當然都儲埋唔少。至去年六月，佢卸任前夕仲有多達二十一萬六千飛行里數係尚未兌換，足以換兩張香港飛往英、美嘅來回商務機票。有人就質疑吳得掂退休後周圍飛遊埠，究竟有冇挪用在任時儲落嘅飛行里數。

教育局回覆本報時話，根據紀錄，吳得掂離任前已幾乎盡量將因公幹旅程而獲得嘅飛行里數，按既定程序用於教育局。至於餘下嘅一萬飛行里數，則未有適當嘅公幹旅程可使用。一萬飛行里數連換張來回台灣嘅商務機票都唔夠，吳得掂真係唔止公幹旅行去到盡，連飛行里數都兌到盡，想蝕底都難喇。

卓妮