中環出更：名人撐派錢：大家開心啲

香港工業總會珠三角工業協會常務委員潘少忠同太太、細仔潘偉業同兩個孫女一齊入馬場，講起社會各界要求派錢嘅呼聲高漲，潘少忠話歷屆財爺都係守財奴o架啦，雖然企業未必鍾意派錢，但係既然政府睇好未來五年嘅經濟，又有啲界別嘅市民冇照顧到，咁點解唔派錢， 等大家開心啲呢？

潘少忠又自爆啱啱做完白內障手術，佢特登揀新開嘅港怡醫院，貪新開張唔使排隊，原本去年底做第一隻眼時真係唔使排，但係最近做另一隻眼時就爆晒棚，當中有好多內地人。

高鼎國兩子寧去濕地公園

佢認為，今次派糖側重教育、輕醫療，政府應該放多啲資源喺醫療同長者身上。

香港鐘表業總會前主席高鼎國都帶埋太太同兩個囝囝入場撐愛駒，佢話今次預算案無厘頭派海洋公園入場飛最搞笑，佢兩個仔都唔恨去，寧願去濕地公園喎！佢都覺得應該加大對長者嘅照顧，好似醫療券同長者兩蚊搭車優惠，尤其係兩蚊優惠真係鼓勵好多老人家周圍走，擴闊生活圈子。

高鼎國（右）話兩個仔都唔恨去海洋公園，旁為其太太張尹馨。

楊國佳話唔恨政府派糖。（溫國佳攝）

楊國佳：啲錢擺自己袋好過

轉頭見到「工廈大王」楊耀松長子楊國佳，佢同好友名下愛駒首次出賽即勝出，開心到飛起。問到今次財爺派糖有冇派大大份畀佢，佢笑笑口話點會有呢？仲話「啲錢擺喺自己袋好過畀佢揸喇！」但佢就唔恨政府派糖。

卓妮