政情：陳恒鑌學琴 只為「激」囡囡
俗語有話相嗌就唔好口，冇乜嘢事就唔好同人鬥氣。之不過，立法會議員陳恒鑌（Ben）係另類爸爸，佢居然同自己個囡鬥氣，四十幾歲人先去學鋼琴，要證明一下自己嘅實力喎！咁大個人仲係咁包拗頸，唔知個囡會唔會都學埋佢啲脾氣呢？
學咗三個月 識彈兩首歌
其實阿Ben係用心良苦嘅，佢話囡囡學緊鋼琴，但就冇乜心機去練習，咁佢一直以嚟都想學習一種樂器，所以就同個囡講「我學嘅話實好過你o架」，從而激勵囡囡練習。佢學咗三個月已經識彈兩首歌，佢仲唔怕羞咁話，雖然係音樂初哥，但覺得自己幾有天分o架，依家學睇數字譜，遲吓就再學睇五線譜，慢慢逐步逐步嚟。
咁呢招激將法有冇效呢？佢笑住話，囡囡依家準備考第三級鋼琴試，都好努力練習緊，第時應該可以佢一邊彈，囡囡做伴唱咁話。咁遲吓就可以父女檔一齊唱歌氹老婆喇！