政情：梁君彥揀主席新車：識郁就得
立法會預留咗九十萬港元更換大主席梁君彥嘅座駕「LC 1」，唔知佢打算換咩車呢？梁君彥尋日出席傳媒茶敍時，大家都追問佢想換乜嘢牌子同型號車，但梁君彥就施施然話，架車用咗八年o架喇，之前畀機電工程處Certified咗，咁咪要買過囉！咁會揀邊款車？佢就笑住話乜嘢車都得，郁得就得o架喇！
發表預算案 立會空前安靜
梁君彥又提起前日政務司司長陳茂波喺立法會發表新一份預算案嘅情況，話自己做咗咁耐主席都未見過咁靜嘅，以前開會起碼都要趕幾個人出去，今次就得番議會陣線朱凱廸喺尾嗌咗幾句，仲好似係未嗌完就收咗聲。傾傾吓，咁啱當時立法會財務委員會開緊特別會議，就修改《會議程序》投票，梁君彥就指住電視話，如果畀着係以前，可能已經有幾個人衝咗出去喇，依家咁幾好！
佢仲話以前開會最悶係班議員講完又講，講嚟講去都係同一樣嘢，而且最慘係有啲人講嘅嘢同佢平時做人好唔同，悶到佢瞌眼瞓，但佢又唔可以瞓喎，就惟有搣大髀搣醒自己嘞！