政情：孔廟補地價太貴 湯恩佳冀減額
孔教學院喺幾年前已計劃耗資五億元，喺鑽石山大磡村舊址興建本港首間孔廟，計劃仲設有孔教文化圖書館同中醫診所等，但呢個計劃就遇上困難。六宗教領袖座談會尋日舉行新春團賀，孔教學院院長湯恩佳喺致詞時提到，孔聖廟工程涉及嘅補地價太貴，令到計劃受阻，會去信特區政府希望能減低補地價，仲呼籲現場嘉賓聯署支持添！
交通意外頻生 促改善制度
除咗呼籲政府幫手解決孔廟嘅補地價問題外，湯恩佳喺致詞時又提到本港近期發生多宗交通意外，令人悲痛，希望死者安息，並促請社會吸取教訓，改善現有制度。至於中華回教博愛社秘書長楊義護喺致詞時亦話今年春天流感盛行，不少市民受感染，令醫護人員大受壓力，希望市民盡快康復，又提到希望廣深港高鐵「一地兩檢」盡快完成立法工作，令港人進入內地更方便同順暢。