政情：議員訪大灣區 公帑豪租行李車
立法會經濟發展事務委員會、財經事務委員會、工商事務委員會同資訊科技及廣播事務委員會，將於下月二十至二十二日到粵港澳大灣區考察。四個事務委員會尋日舉行聯席會議，討論考察行程。三日兩夜嘅大灣區行程將會到訪五個內地城市，每人開支預算約為六千一百元，平均每日二千多元，當中更包括行李車費用每人二百五十元。連熟悉旅運嘅旅遊界立法會議員姚思榮都問，大家只係去三日兩夜啫，係咪真係要用到行李車咁大陣仗呢？
聯席會議由經濟發展事務委員會主席林健鋒（Jeffrey）主持，與會嘅議員亦同意由佢擔任考察團團長。今次考察團會去深圳、東莞、中山、佛山及廣州五個城市，行程包括參觀華為深圳坂田總部、內地首家虛擬銀行、松山湖科技產業園區，考察深中通道等多個大型基建，亦會同各市領導會面，最後就會喺廣州搭高鐵再轉車返港。
姚思榮倡深圳灣過境睇一地兩檢
姚思榮喺會上就質疑，得三日兩夜係咪真係需要另租行李車，認為行李可以擺旅遊巴嘅行李架，又建議最近咁多人都講深圳灣口岸一地兩檢，但好多人都冇去過，不如考察團經深圳灣口岸到內地，順便畀議員感受一下一地兩檢係點樣。
Jeffrey就解釋，預料參加嘅議員人數都需要兩架旅遊巴，覺得行李分開運送嘅好處係唔使等行李。因為議員一日去咁多地方，如果行李車一早將行李送到酒店，議員抵達酒店時就可以直接拎行李上房，唔使再花時間等啲行李搬落車喎。姚思榮對呢個說法似乎都好有保留，叫Jeffrey再考慮一下。議員考察花嘅係公帑，自然要用得其所。
至於經深圳灣口岸過境，順便睇埋一地兩檢，周浩鼎同工程界盧偉國等幾位建制派議員即刻以交通理由表明呢個唔係最好嘅路線安排。Jeffrey亦都話佢哋首站係去華為總部，如果唔經原定嘅皇崗口岸過境，而由深圳灣口岸過，可能時間會差成個鐘。連民主派嘅資訊科技界議員莫乃光（Charles）都話，希望今次集中於大灣區，一地兩檢事宜就其他場合或委員會先跟進喎。似乎Charles想參觀華為多過深圳灣口岸喎。