中環出更：郭偉強扭擰 拒與慢必「行埋」
新一份財政預算案前日出爐，不過派糖不均，惹嚟建制派同泛民主派共同炮轟政府。人民力量陳志全（慢必）更向工聯會郭偉強同民建聯蔣麗芸（Ann）招手，一齊向財政司司長陳茂波（波叔）施壓，要求交出預算案修正案。不過，郭偉強就藉口多多，點都唔肯同慢必行埋！
慎防有詐 要同黨友傾吓
立法會財務委員會尋日召開會議，波叔出席會議解答議員提問，點知建制泛民一齊鬧爆預算案。到下午阿Ann同郭偉強喺會議室外討論預算案時，慢必同議會陣線朱凱廸行過，慢必就撩阿Ann「咩都唔好講，不如一齊去咪兜，淨係叫財爺出一份修正案，唔理點改。」
阿Ann由前日睇完預算案已經好不滿，所以覺得慢必嘅建議有得諗。點知郭偉強就扭扭擰擰，話要返去同黨友傾吓先，點都唔肯同慢必企埋一齊。梗係要返去同黨友傾吓先，慎防有詐。
卓妮