中環出更：電動車撤稅務豁免 蔡少森買唔落手
為咗更加環保，政府近年推動市民用電動車，但喺舊年四月取消咗豁免電動車首次登記稅，令到唔少有意買電動車嘅人卻步，而香港中華廠商聯合會常務會董蔡少森都係其中一個。
香港潮屬社團總會早前舉行新春團拜，現場見到會董林月萍、九龍潮州公會青委會主任張詩培同蔡少森好好傾。講起以前揸過電動車，大讚輕巧、順暢、寧靜，所以都想買番部，點知撞正取消豁免，搞到啲車貴晒就冇買到，佢仲話政府應該推番個豁免出嚟，就算今年唔做，下年都要做，咁先推動到啲人用電動車。不過，新一份預算案只係建議新增電動車「一換一」計劃，睇嚟佢都會失望嘞！
陳振彬倡電動公共交通工具
已經揸緊電動車嘅觀塘區議會主席陳振彬，就話唔係因為有稅務豁免先買嘅，而係佢係一個環保先鋒，以前未有電動車都係揸混能車，然後喺一年幾前就買咗電動車，仲話電動車性能好，特別係泊車嘅時候經電腦計算，所以特別精準。佢亦提出推動電動公共交通工具，如巴士、的士等，只要政府加強配套，以及研究「可攜性電池」，等巴士可以喺中途換電，認為香港係一個細城市，行車距離唔會好長，相信呢個方向絕對可行，而且值得推動。
睇嚟用家都好支持電動車，唔知賣家方面又點睇？香港進出口汽車商會會長羅少雄話新能源嘅汽車係新趨勢，遲早都需要推動，特別係電動車安全性高，都係好大嘅優點兼賣點。佢又話淨係稅務豁免係唔夠嘅，政府應該帶頭推動用電動車嘅風氣，如政府依家有七千多部車，當中得一百部多啲係電動車，比例太小，如果政府肯引入多啲電動車，咁成效就一定更好喇。
卓妮