政情：工總設立發展委員會 探索大灣區商機

工總主席郭振華尋日連同五位副主席，包括嚴志明、葉中賢、楊悰傑、查毅超同陳祖恒出席新春午餐聚會，分享工總未來動向。郭振華話今年該會特別喺珠三角委員會旗下新成立粵港澳大灣區發展委員會，並由葉中賢擔任主席。

盼帶動會員升級轉型

葉中賢就話大灣區將來可能係全世界G D P規模最大嘅灣區，希望成立委員會可帶動珠三角區域內嘅工總會員升級轉型。

港府今日將公布財政預算案，郭振華希望繼續向政府爭取研發資金投入可以扣減稅務優惠。至於派錢，佢強調工總一向支持投資未來，比派錢更重要。