政情：陳振英撐電競 指囝囝打機無損學業
電子競技產業成為全球新興產業，甚至被納入亞運項目，但仍有唔少家長認為打機係嘥時間。一直推動電競業發展嘅立法會議員容海恩（Eunice）尋日召開記者會，促請政府喺財政預算案撥資源支持電競業發展，嚟撐場嘅金融界議員陳振英（Ronick）仲自爆囝囝一考完試就打機至夜深，但作為老竇嘅佢都冇反對，認為只係平衡生活咁話。
認為正規化可帶來效益
Ronick話自己電子技能就麻麻地，但囝囝就熱愛打機，次次考完試都打機至夜深，雖然囝囝愛打機，但都已讀到碩士，所以佢覺得打機唔一定會影響學業。而體文界議員馬逢國就自爆打機十年，覺得電競係創意產業，都值得支持，雖然外界對電競應否當成體育項目有唔同意見，但佢覺得年輕人都喜愛電競，只要將其正規化，係可以帶來效益。
鍾意踢波嘅醫學界議員陳沛然就連足球電子遊戲都啱，又話佢已註冊為五人足球員，但缺乏場地訓練，電競都一樣，係需要硬件支持。
作為三女之父嘅佢又話好多父母覺得打機打得太耐會壞眼，其實踢波踢得耐都要休息，任何運動過度都係唔好咁話，佢仲叫大家要多多支持電競產業添！幾位議員咁落力為電競「洗底」，唔知佢哋又會唔會約埋打機呢？