政情：橫洲小組 建制夾擊朱凱廸 勢包攬正副主席
元朗橫洲公屋發展項目備受爭議，立法會就成立咗跟進橫洲發展項目事宜小組委員會。小組委員會今日就會開會，兼選出小組委員會嘅正、副主席。建制派議員麥美娟（Alice）同就橫洲事件不斷狙擊政府嘅民主派議員朱凱廸，將角逐主席職位。不過，橫洲風波係喺二○一六年九月發生，政府亦已多次解畫，事隔已經差唔多一年半，真係乜都過晒氣。麥美娟同朱凱廸連過氣主席都要爭，唔通係怕喺立法會頻頻出怪招嘅朱凱廸會玩嘢？
橫洲風波始於一六年九月立法會換屆選舉，當時朱凱廸主打新界官商鄉黑勾結議題，之後爆出橫洲風波。朱凱廸當選議員之後，仍然不斷就橫洲事件狙擊政府，唔止就政府就橫洲發展「摸底」一事對政府窮追猛打，又要求政府喺整體工程儲備基金中，抽出有關橫洲發展項目嘅撥款，政府官員都已經多次就事件解畫。事隔咁耐，政府都已經換咗屆，連相關決策局局長都換埋人，橫洲小組委員會先至成立到，真係乜都過晒氣。
麥美娟柯創盛合力執掌
呢個喺立法會房屋事務委員會轄下成立嘅跟進橫洲發展項目事宜小組委員會將於今日開會。小組委員會有二十七名議員加入，包括十六名建制派議員同十一名民主派議員。而小組委員會將研究同跟進橫洲發展項目相關事宜，包括就橫洲發展項目成立行政長官督導小組嘅理據、與各方持份者溝通嘅過程細節，以及橫洲項目嘅公共房屋數目同時間表等。
雖然小組委員會成立都唔知慢咗幾多拍，但建制派似乎都嚴陣以待。工聯會Alice同民建聯議員柯創盛就會競逐小組委員會正、副主席，擺明想包攬正、副主席之位。而據悉一直對橫洲事件咬住唔放嘅朱凱廸，就會挑戰Alice競逐主席一職。不過喺建制派人多嘅情況下，朱凱廸睇怕都難以願望成真，嘗到當主席滋味喇！
志在必得 嚴防朱出怪招
建制派對於一個過氣小組委員會嘅過氣主席位都要志在必得咁款，無他嘅，鬼叫朱凱廸經常出怪招玩嘢，所以建制派相信都係唔怕一萬，最怕萬一啫！