中環出更：曾慶芸兒時上繳利是 今變絕版鈔
小朋友喺農曆新年期間都會收到唔少利是，但多數都要上繳父母。東華三院總理曾慶芸童年都有同樣經歷，更影響到佢做媽媽管理利是錢嘅態度，但佢當年就因上繳而獲得絕版紙幣喇！
曾慶芸話細個時要交出利是錢，但十八歲出國讀書時，媽媽竟然將佢所有利是錢交還，佢就驚見當中有已經唔再流通嘅五蚊紙幣，算係一個意外收穫。另外，佢亦從中體會到通脹問題，因為多年儲落嘅利是錢竟然買唔到啲乜嘢，所以佢身為人母後，就會將小朋友嘅利是錢儲起作投資，另一方面又畀一定數量嘅利是錢佢哋運用。
囝囝利是 區宇凡捐作慈善
尋日係東華三院董事局嘅新春團拜，多名董事局成員聚首一堂，好似有主席李鋈麟、副主席馬青揚同文穎怡等，當然仲有韋浩文、區宇凡等總理。區宇凡就話年幼時一到年初七就立刻拆利是去買心頭好，但做咗爸爸後，就用另一種態度睇利是錢。佢透露，兩個小朋友從來冇用過利是錢，因為會將佢哋所得嘅利是錢全部捐畀慈善團體，一嚟擔心佢哋亂使錢，二嚟可以教導施比受更有福，而現時兒子已經長大，都仲繼續要求捐出利是錢添！
防止亂使 李鋈麟存入銀行
而李鋈麟就有截然不同嘅態度，因為會將囝囝嘅利是錢入落聯名戶口，同樣防止到佢亂使錢，亦可監察到囝囝嘅財政狀況，而佢都好開心，囝囝每次動用戶口金錢都會同佢講聲。
馬清揚就喺新一年走文青風，轉咗髮型又換埋眼鏡，佢講笑話要貼近年輕人喎。另外，佢話近年電子支付愈見流行，估計將來用電子派發利是會成為趨勢，而佢都有用呢個方式去派利是畀外國嘅親友，但佢仍然覺得用利是封派利是更有氣氛。
卓妮