政情：公民講場：揚言行動升級 葉蔚琳玩殘乘客

自稱有過千位九巴車長支持嘅「月薪車長大聯盟」，日前發起罷駛行動，希望迫使公司調高加薪幅度，但最後只有好個別嘅車長參與，行動以失敗告終。九巴事後答應與大聯盟發言人葉蔚琳會面，等佢有個下台階，但到尋日佢又以公司拒絕承認大聯盟嘅身份為由杯葛會面，並揚言會將工業行動升級。有傳所謂嘅升級行動，就係集體請病假喎。無論新一輪行動有幾多車長參與，最好都係唔好搞到啲無辜嘅乘客喇，否則市民嘅怒火同樣會升級，對九巴同車長都唔係好事。