政情：蔣任宏做大律師 先知搵食艱難
前私隱專員蔣任宏退休後，轉咗做大律師，亦都少咗喺公眾場合露面。早幾日佢現身一個新春酒會時話，執業年幾甚少打官司，多數都係就私隱事宜提供法律意見，佢話入行之後先明白剛入職嘅大律師要維持生計都唔容易喎。
工作唔穩定 冇客恐冇收入
蔣任宏話，年輕大律師嘅工作唔穩定，同打工仔好唔同，打工可以估計到月薪同前途，但做大律師就辛苦得嚟又睇唔到幾時先會喺財政上較輕鬆，所以有啲人都唔知點捱落去。加上近年入行嘅途徑多咗，競爭大咗，冇客上門會擔心冇收入，多客上門又會唔敢推咁啲，怕推咗下次個客唔再返轉頭喎。
蔣任宏自言相比年輕人就輕鬆啲，冇咁多負擔，退休之後做大律師都係為興趣，冇嘢做又冇乜所謂，多得滯要推工作都唔擔心後果，佢都係替年輕大律師呻苦啫。