政情：同學關係疏離 韋志成送仔出國讀書
早年嘅公共屋邨鄰里關係緊密，互相幫忙，不過隨住時代變遷，鄰里之間變得疏離。早前有團體舉行大型盆菜宴，宣揚鄰舍互相守望嘅訊息。出席活動嘅市區重建局行政總監韋志成就慨嘆，唔止鄰舍關係變淡，連同學之間嘅關係都因為競爭而比以前疏離。
互鬥成績變競爭對手
韋志成話，細個讀書時會與同學仔一齊玩彈波子等遊戲，亦會互相學習，但依家嘅校園風氣就互鬥成績，同學嘅關係變成競爭對手。佢個仔就因為呢個問題，上年去咗英國讀書喎。
當日活動係香港青年協會喺全港十八區舉行盆菜宴，市建局主席蘇慶和、青協會長黃嘉純同埋總幹事何永昌都有到場，非常熱鬧。