中環出更：細個玩煙花 侯強炸傷面
今年農曆初二煙花匯演雖然取消咗，但係香港上空依然煙花燦爛，因為唔少人偷偷哋放，甚至喺鬧市都照放。早前卓妮同唔少名人講起呢個話題，佢哋都有玩煙花經歷，更有人因而受傷。好似上水鄉事委員會主席侯志強（侯強），就曾經被煙花炸親添！
早前新界鄉議局舉辦新春團拜，唔少政界名人聚首一堂。作為新界原居民嘅侯強年幼時當然放過煙花，仲係放有「椰子頭」之稱嘅巨型煙花。佢笑笑口話試過點完煙花但唔爆，走埋去嘗試再燃點，結果炸到一面都係，好彩搽燙火膏就冇事喇。雖然曾因玩煙花受傷，但侯強就支持畀市民放煙花，聲稱當年禁放煙花係因為有人用煙花製作炸彈，但現時炸彈可用化學物品製作，直言冇人仲咁老土，所以認為可以喺合法情況下畀市民玩喎。
沈豪傑認為可考慮准玩煙花
香港會計師公會前會長趙麗娟都有玩煙花同炮仗嘅經驗，因為年幼時可以隨街玩，但係佢覺得好危險，因為好容易走避不及被火花辣親。元朗區議會主席沈豪傑就自言夠小心，所以從未試過被整親。佢認為喺安全嘅情況下，可以考慮准許玩煙花。
鄉議局主席劉業強嘅太太劉葉愛愛本身係新加坡人，佢話新加坡新年唔放炮仗，所以初初接觸時覺得好新鮮。不過，佢就認為香港新年氣氛不及新加坡，因為好多人會選擇外遊，佢哋就選擇留港過年，因為子女喺外國讀書，而且丈夫工作忙碌，所以就喺香港陪吓丈夫過節喇！
卓妮