南亞小販亂擺檔 食環縱容累街坊

呢幾日農曆年長假期，大批南亞無牌小販乘機大發新年財，記者連日喺中區直擊發現，南亞小販開到成行成市，遍布干諾道中、畢打街、德輔道中以及交易廣場行人天橋，每日閒閒哋近二百檔搵食，由賣冒牌手袋到衫褲鞋襪，再到電話配件，包羅萬有。記者目測，南亞無牌小販吸引大批外傭幫襯，每檔日進萬金，附近商舖冇啖好食，話每日生意銳減八成，分分鐘關門大吉。

咁都未算吖，南亞小販幫擺檔擺到周圍係，搞到輪椅人士同推嬰兒車嘅家長「走投無路」，焗住「行大運」兜遠路；部分負責「補給」嘅貨車霸佔臨時泊車位甚至巴士站，乘客要走出馬路上車，簡直睇見都牙煙。

南亞小販兵團之所以好似攞正牌咁，都係拜食環署所賜。佢哋係就係有派人巡邏，但係就鬼咁高調，成棚人着晒制服Catwalk咁款，爭在未拉Banner嗌埋咪，同「通水」冇乜分別，現場「天文台」好整以暇向同鄉示警，過百檔小販話都冇咁快執嘢散水。最離譜嘅係，食環署人員發現食白果後，求其喺現場逗留幾分鐘，影幾幅相就打道回府，南亞小販兵團見風聲過去，又可以施施然出返嚟繼續做生意。正如有立法會議員話齋，食環署縱容南亞兵團非法擺賣，唔單止小商戶多得佢哋唔少，仲嚴重影響環境衞生同治安，簡直累人累物累街坊。

話時話，南亞小販兵團除咗「佔領中環」，西鐵元朗站亦係佢哋嘅重要地盤，每日又係講緊做幾十萬生意。鬼咩，食環署職員出名欺善怕惡，捉拿本地無牌小販勢兇夾狼，出動便衣執法，搞到小販衝出馬路被車撞有之；放蛇拘控執紙皮阿婆有之。南亞兵團就唔同喇，一個二個神高神大，兇神惡煞，食環劣吏仲唔老鼠見貓，變晒鵪鶉咩？

一節見則百節知，假難民問題尾大不掉，演變成治安毒瘤，港府遲遲唔肯退出國際難民公約固然係主要原因，政府部門胡混度日亦係難辭其咎。淨係睇吓有「南亞村」之稱嘅深水埗通州街天橋底，食環、地政、民政、社署等六個衙門多年來你推我讓，互相扯皮，結果咪搞成今日咁囉。

官僚靠得住，豬乸會上樹，市民新一年想一家人齊齊整整，平平安安，睇怕都要自求多福咯！