「靈籤都掉轉，香江勢更亂。」呢個世界，有啲嘢可以將錯就錯，好似賭馬咁，有人填錯號碼，諗住都係博博吓，結果就中咗孖Ｔ，無端端富貴逼人來；之但係，有啲嘢就要認真啲，切不可以求求其其，明明錯了，卻「老屈」車公，並美其名為「車公的意思及安排」。
冇錯，老朽所指嘅係新界鄉議局主席劉業強，原本佢為本港求得第四十一籤，沙田鄉事委員會副主席李志麒則為沙田求得第二十一籤；遞籤員疑把兩支籤掉轉，而且將錯就錯。稍通文墨都睇到，兩籤雖然同為中籤，之不過二十一籤為中上籤，四十一籤為中下籤。阿哥，如果老朽係代表沙田區嘅，點都唔肯將錯就錯，四十一籤明明運氣較差，有解籤師傅甚至話「大型車禍會陸續有來，需要小心留意」，亦有解籤師傅話「意味政府施政面對困難，行事會受到反對」。
而二十一籤則指有祖業庇蔭，相對較輕鬆。沙田居民原本可以出入平安，有祖業庇蔭，生活輕鬆些，家陣因將錯就錯，「車公意思」就咁剝奪沙田居民嘅福祉，好唔應該囉！有師傅稱，求籤安排擺烏龍而出亂子，預示香港於狗年運勢「立立亂」，尤其係政局及經濟環境，港人惟有自求多福。
其實，「有則改之，無則加勉」，古人都教訓吾人，有缺失就加以改正，沒有就勉勵自己小心不要犯錯。求籤亦如做人，不誠無物，是故君子誠之為貴。老朽認為，既然未能確實分辨出邊支籤係邊個求得，為求至誠，理應即時化咗支籤，畢恭畢敬再求過，切不可屈車公，更不可以眾目睽睽之下呃自己。
有啲嘢，不誠可以用語言藝術化解，梁實秋舉咗個例子：女人的年齡是一大禁忌，不許別人問的；有一位女士很曠達，人問其芳齡，她據實以告：三十以上，八十以下。然則，香港運程，亦可謂「三十分以上，八十分以下」乎？