政情：鄭錦鐘精打細算 淡季先外遊
唔少城中名人都趁農曆新年假期出外玩吓，但保良局前主席鄭錦鐘就話同太太都鍾意留港過年，等到淡季啲旅遊景點人少啲、機票同酒店費用都平啲先去玩，認真精打細算。
寧留港陪家人
鄭錦鐘同我哋講，話後生時忙於做生意，成日要飛嚟飛去，冇乜時間陪伴屋企人，因此每逢農曆新年自己公司同生意夥伴都收爐後，佢就寧願留港過年，陪吓老婆同仔女。依家佢退咗休，日日都放緊假，就更加唔使揀正喺啲公眾假期外遊同人逼。
佢又透露，有次佢嘅航空公司里數積分儲到爆晒燈，就立即叫人問吓可以換到啲乜嘢優惠機票，結果問到當晚有班飛往丹麥嘅航班，於是即刻叫老婆執行李，幾個鐘頭後就上機。嗰次佢同太太喺丹麥玩咗四日，其中一晚更對住著名嘅「美人魚」雕像食晚餐，即興得嚟都好浪漫寫意。