政情：朱凱廸易惹官非 許智峯連月衰運

何君堯或發生麻煩事

楊師傅指，何君堯係癸水命，用金水，狗年係火土年，木旺，但弱水，狗年運勢唔樂觀，容易出事，包括健康腸胃問題，其次係壓力問題，農曆六月係純土月份，以及九月都可能會有麻煩嘢發生，希望佢講嘢前要諗清楚，從八字睇會惹好多是非。

至於朱凱廸嘅八字係怪八字，屬於另類人，佢人緣好，正直，呢啲八字做法官或律師較稱職，依家做議員就係邊緣人，旺嘅時候特別旺，衰嘅時候就衰到貼地，一係贏晒、一係輸晒，好多時會浮浮沉沉，加上佢係傷官格，一係傷自己，一係傷人，一世人都喺崎嶇路上走，但係佢又樂此不疲。狗年屬土，佢係土命，傷官成格，佢又需要火土，所以今年有啲影響力，但止於上半年，立秋之後兩個月有暗湧，如果出事，農曆七、八月易惹官非。

何俊賢壓力運須疏導

至於峯鴿係水命，但睇唔到有金，判為從勢格，要行火土運，忌金水，大運到己酉，今年運程反覆，上半年比較順暢，但到農曆七、八月或會行兩個月衰運，冇乜嘢特別出錯就冇事，所以唔做唔錯，農曆九月就有少少反彈，有啲好事會畀人見到。

此外，楊師傅又批算高佬賢係金水旺，人緣幾好，有啲無緣無故嘅自來蜢，或者有啲意外之財，火土為用神，狗年似旺非旺，全年運勢較反覆，春季比較吃力，夏季較平凡，農曆七、八月運勢非常好，九月平平無奇，到冬季又幾好，今年行壓力運，「壓力煲都要疏氣，唔疏氣會爆炸」，寄語佢要趁後生累積人生智慧。話時話，風水命理同八字批算，目的都係想幫人趨吉避凶，但信則有、不信則無，大家亦毋須太上心。