中環出更：長輩稱呼太複雜 陳克勤出題考起黨友
呢幾日去拜年，相信大家最怕就係畀長輩問起感情狀況、工作薪金等問題，不過拜年時點稱呼長輩都係一大難題。好似立法會議員陳克勤就出題，問到點樣稱呼爸爸嘅媽媽嘅細佬嘅仔呢？呢個關係聽落都夠晒複雜，最後仲考起議員陳恒鑌、柯創盛同黃定光添！
克勤化身節目主持向多名黨友發問有關農曆新年嘅問題，好似點樣書寫「（抓）銀」、農曆新年期間邊個國家最受歡迎等，而當中問及長輩稱呼都算係難度最高嘞！
叫人用手機程式查詢
柯創盛諗到面露難色，最後都好唔肯定咁答為「舅父仔」，而陳恒鑌就經一輪思考後答「表舅父」，至於黃定光嘅答案就最為接近，佢仲以「一代親，兩代表，三代嘴藐藐」嘅俗語作推論，估計正確係「表叔」或「表哥」。
克勤最終開古，話正確答案係「表叔」或「表伯」，黃定光總算估中一半。咁難記，克勤就建議利用智能電話嘅應用程式，去查詢長輩嘅稱呼喎。睇嚟克勤都係靠科技先知道正確答案。
卓妮