中環出更：四點唔再開記招 許Sir專心打羽毛球
喺二○一四年為時七十九日違法佔領期間，每日下晝四點鐘主持記者會而爆紅嘅「四點鐘許Sir」許鎮德（許Sir），鏡頭背後係一名羽毛球高手，多次衝出香港挑戰國際嘅紀律部隊賽事，試過摘金而回，更憑羽毛球同太太情定終生。原來許Sir嚟緊五月就會退休，轉變跑道前嘅休息時間將會全職打羽毛球，每日四點鐘唔再開記招，而是去開波！
羽毛球喺市民眼中只係消遣運動，對許Sir嚟講就幾乎等同副業，當中除咗球技，仲涉及策略。例如一場二十一分嘅球賽，不需要全場都盡力攻擊，「你拎到兩分，咪讓對手一分，等自己抖抖氣囉」！而許Sir喺羽毛球中嘅最大收穫，相信係佢嘅初戀情人兼太太。兩人喺一次義工活動相識，之後許Sir就不時帶對方打羽毛球，夠健康之餘，又可以一展其運動天賦，最終成功抱得美人歸。許Sir一家不時以打波作家庭活動，而佢同老婆，仲有同仔女曾出戰混雙同親子賽，同樣成功攞獎添！
同吳永嘉不時相約較技
作為警察羽毛球會主席嘅許Sir，亦代表香港警隊征戰各國賽事，例如世界警察及消防運動會，佢就曾經喺一三年摘金，亦分別喺○五年同舊年獲得銀牌及銅牌。佢同另一政壇羽毛球高手、立法會議員吳永嘉（Jimmy）係老朋友，兩人不時相約較技。相比起吳永嘉擅長迅速上力，主攻中、後場扣殺，許Sir就比較慢熱，前半段往往忙於防守扣殺，比分一度被拋離八分。其後許Sir逐漸發力，多次以網前吊球及後場高遠球控制比賽節奏，而Jimmy經一段猛攻後，似乎集中力下降，多次打出界外失分，最終被許Sir反敗為勝。
簡樹強大讚識留前鬥後
事後許Sir嘅羽毛球啟蒙教練、高級督察簡樹強話年輕警員往往只識向前衝，「二十一比○，抑或二十一比十九都係贏，被對方拎幾分無所謂，最重要係識留前鬥後」，佢讚揚許Sir喺羽毛球場嘅表現係佼佼者。Jimmy亦分享打波心得，指唔少人忽略下盤基本功，「以為打到個波就得，但步法好先追到個波」。許Sir話退休後想專心打波，主動話唔會入熱廚房，笑言「老婆講明唔畀呀」。
卓妮