中環出更：黃大仙上頭炷香 李鋈麟搵位好熟手
好多善信今晚都會去黃大仙祠上頭炷香，原來東華三院主席李鋈麟細細個就同爸爸排隊去黃大仙上頭炷香，仲自言熟手搵位同擺放供品，而現時都仲有維持上頭炷香嘅習慣添！
早前東華三院喺沙田馬場舉行挑戰盃，唔少董事局成員都有現身，包括執行總監蘇祐安、副主席馬清揚、蔡榮星同文穎怡，仲有總理曾慶芸等。講起新年傳統習俗時，除咗上頭炷香之外，李鋈麟話以前喺新年前蒸魚至半熟，再放喺屋內等佢發霉，寓意新一年發財，而現時都有類似習慣，但就將鮮魚改為麵粉魚喇！聽落佢都有好多新年傳統，但佢就話唔知係鄉下習俗定爸爸習俗，不過依家都會要求囝囝咁做。
馬清揚分享特色揮春
蔡榮星就慨嘆以前科技無咁發達，唔得閒去拜年都會好有誠意親自致電賀年，有別現時用群組訊息就算喇！馬清揚亦話以前大人會覺得愈早拜年代表愈有誠意，所以細個新年可以一日走十幾場咁誇張。而作為潮州人嘅佢，就透露早前出席活動見到潮州揮春，忍唔住分享呢啲用潮州讀音寫成嘅特色揮春，睇嚟佢都想為傳承傳統出一分力喇！
曾慶芸為屋企人蒸糕
至於蒸糕點方面，曾慶芸就話細個三兄妹會幫忙炸油角，但大咗先意識到，媽媽當年分麵粉畀佢哋，其實只係唔想佢哋搞搞震，而唔係真係需要幫手喎。佢更話媽媽以前會喺年三十蒸糕，而佢都學咗呢門技巧，每年都會為屋企人蒸糕。不過，佢就大嘆囝囝只幫手食，好彩有姪女自動幫手，所以現時就將蒸糕傳統傳畀佢。
卓妮