開講有話，一樣米養百樣人。港產官僚成日畀人話食嘢唔做嘢，做嘢打爛嘢，但其實凡事都有例外，好似入境處咁吖，上上下下兢兢業業，急民所急，呢啲好官真係抵市民畀個Like佢哋！
入境處尋日總結過去一年業績，兼夾展望來年新大計。對於市民最關心嘅假難民問題，入境處舊年共接獲一千八百多宗免遣返聲請個案，較前年大幅減少五成；加上目前平均處理個案時間由二十五周減至十周，積壓個案由一五年高峰期下跌五成，去到依家得番五千八百幾宗，假難民問題有所緩解。
除咗加快審批程序，入境處喺遣返假難民方面同樣不遺餘力，前後兩次用包機方式進行遣返，成功送走近百名假難民。冇錯，比起滯港假難民大軍嚟講，可以話係杯水車薪，但正所謂萬丈高樓平地起，好嘅開始係成功嘅一半；至於打擊黑工方面，入境處舊年共採取一萬五千幾次行動，平均每日出動超過四十次，拘捕嘅非華裔黑工近五百名，表現都咪話唔神勇。
講到呢度，功夫茶冇法子唔賣花讚花香。港府最初對假難民問題闊佬懶理，如果唔係本報發揮第四權監察精神，鍥而不捨踢爆南亞兵團禍港亂象，喚起社會各界關注，當局到依家可能仲當冇事發生。仲有喎，本報一早要求港府對假難民實行即捕即解，入境處從善如流，使出一招「包機送瘟神」，絕對值得肯定。如果港產官僚個個都學似入境處咁積極主動，香港就唔使好似依家咁立立亂喇！
咁當然，要從根本解決假難民問題，莫過於香港退出國際難民公約，最低限度都要設立禁閉式難民營，徹底杜絕假難民來港食大茶飯嘅誘因。天下熙熙，皆為利來，正正係因為港府中門大開，司法機構慈悲為懷，香港對假難民至咁有吸引力，打黑工又得，幫黑幫睇場、販毒、爭地盤、食大茶飯又得，強姦非禮都仲得，何止遍地黃金，直頭係人間天堂，唔爭先恐後就有鬼咯。諗都諗到啦，假難民無涯而入境處人手有涯，一日唔從源頭堵截，入境處點樣加快審批聲請個案，點樣勤力打擊黑工，始終都係同抱薪救火冇乜分別嘅咋。
講開又講，上屆政府明明喺施政報告裏面，實牙實齒話會檢討退出難民公約，點解搞吓搞吓好似冇咗件事咁，唔係又諗住走數吓話！
呢嗱，話咁快送雞迎狗，又係除舊立新嘅時候。香港市民新年願望其實好卑微嘅啫，但求有啖安樂茶飯食吓就滿足。唔該高官快啲兌現番張支票，切實解決假難民問題，還市民一個安全城市！