政情：鍾國斌 葛珮帆無懼摸頂買豪宅
喺美國加息陰霾之下，有市場人士就預言香港嘅樓市將「寒風陣陣」。不過有立法會議員就無懼摸頂買豪宅，其中立法會議員葛珮帆（EQ）同紡織及製衣界議員鍾國斌（Felix）就先後入市，EQ購入大埔鹿茵山莊單位，而Felix就以三千零一十五萬元，購入西貢清水灣道新盤一個頂層特色戶。睇嚟兩人唔止有「實力」，而且都鍾情於新界東豪宅噃！
EQ喺舊年購入鹿茵山莊一個單位，佢解釋之前一直住緊嘅沙田第一城已經住咗十幾年，啲嘢都好舊喇，要裝修嘅話都要使一大筆，加上佢都想換個環境，所以就同老公揀咗鹿茵山莊。雖然對經常往返立法會嘅EQ嚟講係搬遠咗，但佢就話如果唔塞車嘅話，其實同喺沙田住時差唔多，都係大約三十分鐘車程就可以返到立法會。
舊樓出租放售 葛未諗定
樓市風高浪急，政府亦冇撤回樓市「辣招」，EQ入市唔知用咗幾多錢呢﹖點知不論係幾多錢購入單位定係單位面積係幾多？EQ都話唔想透露，真係神秘。不過，佢就承認今次係細屋搬大屋，不過就唔係獨立屋，因為太貴「住唔起」喎。而我哋翻查資料，舊年鹿茵山莊非洋房嘅成交價由一千二百八十萬元至二千六百五十萬港元都有，而EQ仲未放售第一城單位就已經購入鹿茵山莊，睇嚟都好有實力。
市場人士預言樓市會下跌，EQ就話因為係自住，唔打算炒賣，所以認為可以負擔就購入，而且計落呎價其實唔係太高。至於會唔會出租或放售第一城單位，佢就話仲未諗定，因為新居收樓等咗好耐，佢依家同老公正忙於執屋，之前淨係搬咗行李入去瞓，呢兩日先至搬傢俬，真係「七國咁亂」，希望農曆新年前可以完成螞蟻搬家任務咁話。
鍾搬大屋 入手頂層單位
除咗EQ，Felix上月中先至以三千三百萬元賣出西貢匡湖居雙號屋，旋即就喺同月月底以三千零一十五萬元，入手清水灣道新屋苑頂層單位。其匡湖居舊單位面積為一千三百七十二平方呎，而清水灣頂層單位則為一千四百九十三平方呎，仲連一千一百五十七平方呎天台添，同EQ一樣都係細屋搬大屋。Felix就話自己都係買嚟自住o架啫！