中環出更：情人節打邊爐 容海恩唔陪男友
今日係年廿九，亦都係情人節，所以唔少人除咗忙於辦年貨，亦都要為情人節花心思。立法會議員容海恩（Eunice）尋日就同一班公民力量嘅成員視察新田購物城試業情況，攞正牌行街辦年貨，不過佢就話明唔會為情人節作準備喎。
Eunice除咗話唔使為情人節準備禮物，仲透露情人節會同沙田區議員陳敏娟等地區樁腳過節，而佢更一早預訂牛肉同海鮮，似乎諗住食餐勁喇！不過，佢就冇入廚房露兩手嘅打算，講笑話只負責出錢，而且將會打邊爐，將所有食材倒晒落去就得嘞！
佢仲直言情人節唔陪另一半都唔會惹投訴，仲講明唔會叫男友一齊打邊爐，但就叫公民力量主席潘國山（山哥）一齊去。
一班兄弟齊心幫黃嘉榮睇衫
不過山哥相當醒目，立即叫Eunice唔好擺佢上枱，但其後都有幫手解困，力證Eunice嘅情人節喺工作中度過。
同行嘅仲有沙田區議會主席何厚祥、沙田區議員黃嘉榮（William）同黃宇翰等，一班兄弟都非常有心，齊齊幫William睇衫，事關William經常以花俏服飾示人！William就認為只要打扮得多同一風格，其他人會習慣從而形成個人風格，所以話鮮艷嘅服飾唔難襯。
黃宇翰倡交通接駁關口吸客
而黃宇翰就將購物城同日本嘅Outlet作比較，認為應該提供更方便嘅交通工具連接關口，先可以吸引到內地旅客。山哥同何厚祥就大讚設立購物城嘅初心，但目前未能做到分流水貨客嘅效果，直言要啲時間，但佢哋都願意將來設團，帶街坊去參觀咁話喇！
卓妮