中環出更：一地兩檢委員會 建制三子冇報名

非建制24人全數入會

一地兩檢委員會前晚十二時正截止報名，建制派及民主派都瘋狂「冧友」入會，以爭奪委員會嘅控制權同話語權。最終廿四名非建制議員全數報名，包括成日唔開會嘅醫學界陳沛然。建制派更有多達三十六人入會，民建聯、經民聯同工聯會三大建制黨派，全部成員都有報名，令委員會人數增至六十人，可能係歷來最多人嘅法案委員會。

自六名非建制議員被取消資格後，現時立法會只剩番六十四名議員，其中立法會主席梁君彥按慣例唔會加入任何法案委員會，即係只有三人冇報名，佢哋就係廖長江、鍾國斌同潘兆平。

廖長江身為建制派「班長」，就算唔入會，都唔會有人質疑佢作反或唔勤力。自由黨向來反叛，今次只有鍾國斌一個冇報名已算好畀面。至於潘兆平就一向冇乜「存在感」，加上佢好少就非勞工議題發言，少咗佢對政府亦冇乜損失。

建制派喺一地兩檢委員會嘅人數，比非建制多出五成，應能順利喺明日嘅首次會議，選出新民黨葉劉淑儀及民建聯張國鈞做正副主席。但根據過往經驗，唔少議員喺「冧完友」、選完主席之後，就會紛紛退會或長期唔開會，仍有機會畀民主派突擊偷襲，阻撓法案如期喺今年七月立法會休會前通過。

卓妮